Lifandi mynd

Um verkefnið

Í þessu verkefni vinna nemendur með sköpun í hljóðvinnslu í tengslum við myndræna sköpun.
Nemendur teikna mynd og tengja við hana hljóð sem þeir taka upp, búa til eða afla í einhverjum tilvikum með öðrum hætti.
Þetta verkefni hentar mjög vel í þemavinnu og hægt er að nota það með flest öllum viðfangsefnum í skólastarfi, til dæmis námi og kennslu um umhverfið , Íslandssögu, tónmennt eða árstíðirnar.

Búnaður

Nemendur teikna mynd á blað í tölvu eða spjaldtölvu
Forrit í tölvu eða spjaldtölvu til að búa til myndband úr myndinni og tengja hljóð við
Ef nemendur taka upp sín eigin hljóð þarf tæki með upptökubúnaði til dæmis síma, spjaldtölvu, hljóðupptökutæki með innbyggðum hljóðnema eða hljóðnema tengdan hljóðupptökutæki.

Verkefnalýsing

Nemendur teikna mynd á blað eða í tölvu. Ef notuð er spjaldtölva getur verið gott að nota penna fyrir snertiskjá.
Ef mynd er teiknuð á blað er hún skönnuð eða mynduð til að koma henni í stafrænt umhverfi.
Nemendur skoða það sem er á myndinni og velta fyrir sér og ræða við kennara hvaða hljóð gætu átt við myndina.
Nemendur safna saman hljóðum sem þeir ætla að nota við myndina, annað hvort með því að safna saman hljóðum sem til eru á netinu eða með því að taka upp og búa til sín eigin hljóð.
Nemendur setja myndina inn í forrit sem hentar til að tengja hljóð og mynd, iMovie, Premiere Pro eða annað forrit af svipuðum toga.
Nemendur raða hljóðum upp eins og þeir vilja að þau hljómi, annað hvort hvert fyrir sig, eitt í einu eða með því að búa til blöndu af þeim öllum saman.
Beina má athygli að myndinni í heild eða einstökum þáttum hennar, til dæmis með því að láta hana birtast í hlutum, litast í hlutum eða leggja inn orð, tákn eða merkingar.
Hægt er að búa til margar heilmyndir þar sem hlutir, litir eða merkingar koma smám saman inn í myndina eða leggja hluti, myndhluta og merkingar inn á heilmynd í bakgrunni
Hér fyrir neðan má sjá dæmi að tilbúnu verkefni.

Sýnidæmi