Lestur og leikræn tjáning

Um verkefnið

Nemendur lesa upp ljóð, sögu eða brot úr leikriti og fá að hlusta á upplesturinn til að heyra hvað gekk vel og í hverju þeir geta bætt sig.
Í þessu verkefni snýst upplesturinn um innlifun og leikræna tjáningu, þetta verkefni getur nýst sér vel í námsgreininni leiklist.
Það getur hjálpað nemendum mikið að fá að heyra í sjálfum sér til að átta sig á hvað gera má betur, ekki síst ef flytja á efnið fyrir framan stóran áheyrendahóp.
Einnig er hægt að æfa með þessum hætti mismunandi raddbeitingu eða leikstíla og læra margt af því.

Búnaður

Í þessu verkefni þarf einfaldlega tæki sem er með innbyggðan hljóðnema til að taka upp hljóð og innbyggðan hátalara til að hlusta á upptökuna. Einnig má nota samsettan búnað.

Verkefnalýsing

Kennari og nemendur ákveða saman hvaða ljóð, sögu eða leikþátt á að lesa upp.
Nemandi les textann upp og tekur sig upp á hljóðupptökutækið; síma, spjaldtölvu eða annan búnað.
Nemandi hlustar á upptökuna sína og skrifar niður hvað mætti fara betur í upplestrinum og tjáningunni. Það gæti snúist um skýrleika, hæfilegan hraða, jafnara flæði, minna hik, framburð á ákveðnum orðum, raddstyrk, áherslur, mótun setninga, kúnstpásur og fleira, en líka leikræna tilburði, persónusköpun, tjáskipti og leikstíl.
Kennari hlustar á upptökuna og rennir yfir það sem nemandi skrifaði niður.
Kennari kemur líka með athuagsemdir og ábendingar um það sem tókst vel og gera má betur.
Nemandi æfir sig í því sem hann ætlar að bæta
Nemandi tekur upplesturinn aftur upp með leikrænum tilþrifum.
Nemandi hlustar á upplesturinn og skrifar hjá sér hvernig til tókst.
Hægt er að endurtaka þessi skref eins oft og kennari og nemandi vill. Einnig má prófa að lesa upp annan texta, mögulega texta af öðru tagi.