Hlaðvarp/podcast

Um verkefnið

Verkefnið snýst um að búa til hlaðvarpsþátt og leyfa nemendum að nota hugmyndaflugið í umræðum um valið viðfangsefni..
Nemendur æfa sig í að ræða málin og tala gagnrýnið um ákveðið mál.
Hægt er að hafa með í þættinum viðtöl þar sem nemendur æfa sig í að spyrja góðra spurning, svara spurningum og nýta sér virka hlustun þegar þeir hlusta á viðmælanda eða spyril. Einnig má taka viðtöl við einhverja utan bekkjar eða skóla.
Með hlaðvarpsverkefni æfa nemendur sig í tjáningu, orðaforða og að geta tjáð skoðanir sínar og rökstutt þær.
Hlaðvarpsverkefni er hægt að nota í mörgum námsgreinum, til dæmis til að fjalla um valið landsvæði, náttúrufyrirbæri eða umhverfismál, fréttir og samfélagsmál, atburði og tímabil í sögunni, sögupersónur og höfunda í bókmenntum eða kvikmyndum, listamenn, listaverk og listgreinar. Einnig má þjálfa erlend tungumál og þýðingar svo eitthvað sé nefnt.

Búnaður

Nemendur skrifa hugmyndir sínar annað hvort á blöð eða í tölvu.
Hægt er að taka þáttinn upp í hljóðveri með hljóðbúnaði og hljóðnema eða nota spjaldtölvur, síma eða fartölvur sem eru með innbyggðum hljóðnemum.
Til að fá bestu gæðin er gott að vera í herbergi þar sem ekki er mikið bergmál eða hljóð sem geta truflað upptöku.

Verkefnalýsing

Kennari kynnir verkefnið og segir nemendum hvert þemað í hlaðvarpinu sem búa á til eigi að vera.
Nemendur vinna í hópum og koma með grófa hugmynd að því sem þeir vilja ræða í þættinum og hvernig fara mætti yfir efnið.
Nemendur segja kennara frá hugmynd sinni að viðfangsefni og kennari annað hvort samþykkir hana eða biður nemendur að hugsa málið betur.
Nemendur afla sér upplýsinga um viðfangsefnið sem þeir ætla að taka fyrir í þættinum.
Nemendur búa til handritsdrög að hlaðvarpsþættinum: Hvað á að tala um, hvernig á að fjalla um efnið og hvernig á þátturinn vera? Á að hann byggja á samræðum eða ætlar einhver að vera spyrill og leita eftir svörum og áliti annarra?
Nemendur kynna hugmyndina sína fyrir kennara.
Nemendur fá búnað til að taka upp þáttinn. Gott væri að æfa sig fyrst og prófa upptöku.
Nemendur taka upp þáttinn í bútum eða í einu rennsli. Til að fá bestu gæðin er gott að vera í herbergi þar sem ekki er mikið bergmál og lítið um hljóð sem geta truflað upptöku.
Fyrir lengra komna og viðameira verkefni má klippa saman efni og leggja inn hljóð, tóndæmi og lesið efni.